لازم يدرس

موضوع: لازم يدرس السبت يونيو 26, 2010 11:51 am

لازم يدرس
*********
واحد اتنين لأ كانوا تلاته
لأ دول أكتــر لأ ما علينـا
مين بقي هما دي هيا حكايتي
قصة حب انما مجنونه.
كنت بحبها بس ياعيني
قلبها يظهر قلب كبير
بيساع غيري كمان ويسعني
ويساع بدال الحب كتير.
حبها ده لازم يدرس
لازم يعمله منه كتاب
وانا عن نفسي درسته كويس
أوله كدب واخره عذاب
بتخليك تتعلق بيها
ترسم ليك الشوق فعنيها
واما تبص وراك تلاقيها
لسه لقلبها فاتحه الباب
********************
تبقي معاك وكمان مع غيرك
دقة قلبها نغمة كدب
تفرح قوي لحظة ما تسيبك
وتبيع فيك علشان بتحب
وده كان حالي معاها وحالهم
بس الفرق أنا اللي كسبت
فهمتها قبل ما تفهمني
وبدال ما الومها لقتني ضحكت.
حبها ده لازم يدرس
لازم يعمله منه كتاب
وانا عن نفسي حفظته كويس
أوله كدب واخره عذاب
بتخليك تتعلق بيها
ترسم ليك الشوق فعنيها
واما تبص وراك تلاقيها
لسه لقلبها فاتحه الباب
********************