من اشرف لاشرف برضو

يسترها معاك ياأشرف ياابنى

ويفتحها فى وشك منين ماتروح

ويجعلك
دايما مستور

عارفك غلبان

مطحون فى الدنيا وشقيان

بتعافر
فيها وبتقاوح

ومع ذلك لساك انسان

دوغرى وطول عمر لسانك فالت

طول
عمرك بتحب الناس

وكلامك اكمنه مدب

بيخبى وراه الاحساس

يسترها
معاك ياأشرف ياابنى

كمان وكمان

ايه اخرة جريك فى الدنيا

ايه
اخرة نحتك فى الصخر

وانت اللى فى الاخر خسران

شقيان وطالع
عين اهلك

وتنك عدمان

ولابيجد جديد فى حياتك

ولابتقاطع
مرة سكاتك

على طول همدان

خايف من بكرة؟

عبيط من ايه
بتخاف

الدنيا ياأشرف ياابنى

مش عايزة الخواف

اضرب
فيها بكل ماعندك

واعند فيها يوم ماتعاندك

وانت الكسبان

كفاياك
تفضل انسان

دى الدنيا مهمن صدقت

برضك كدابة

واللى من
طبعه حمل

لايمكن يعاشر ديابة

وعشان ماتبقى حاجة

لازم
تبقى ديب

لازم تعرف العدو من الحبيب

واتعلم تمسك ايدك

وترقع
خرام الجيب

متصدقش المثل الخايب

اصرف مافى الجيب

ده
مثل خيبان

اللى يصدقه

يعيش عدمان

ويموت عدمان

وان
مقدرتش تبقى حاجة

كفاياك تفضل انسان

محدش بيموت من غير عشا

محدش
بيموت ناقص عمر

انا اعرف ناس ماتو بعد ما اتعشو

واعرف ناس
ماتو وهم بيحشو

واعرف ناس مداقتش الزاد من زمان

ولساها عايشة

لساها
زى الشعرة

طويلة وهايشة

ولانافع فيها فرد بمكواة

ولانافع
فيها مقص

واياك تبص لعيشة غيرك

ياما غيرك بص

واخرتها
ماتو عميان

ارضى بعيشتك

واحمد ربك

كفاياك تعيش انسان

وتموت
انسان

فاهمنى ياأشرف ياابنى؟

والا اقول كمان؟

» اشرف خميس