حاجات

موضوع: حاجات الأحد يوليو 18, 2010 1:46 am

فى حاجات مقدرش اقولها وفى حاجات

عاشت جوايا بس ماتت السبت اللى فات

وفى حاجات عاشت لحد يوم التلات

وفى حاجات بنستنى وصولها

وفى حاجات يستحيل اصلا حصولها

وفى حاجات لو مدينا الايدين نطولها

نلقاها وهم وذكريات

وفى حاجات سهلة وبريئة

وفى حاجات حلوة ورقيقة

وفى حاجات كدب وحقيقة

وفى حاجات ماتت من سكات

وفى حاجات زى موج البحر غارقة

وفى حاجات زى الدنيا مفارقة

وفى حاجات مهياش معانا فارقة

وفى حاجات مسابقة اللى فات

وفى حاجات مجنونة ساكنة قلبنا

وفى حاجات ملعونة بتجرى فى دمنا

وفى حاجات لامين همومها

وفى حاجات يستحيل تلمنا

وفى حاجات زى موج البحر محتاجة شط

وفى حاجات جوانا بتتشال وتتحط

وفى حاجات زى المسلسلات مليانة مط

وفى حاجات حكاياتها جميلة

وفى حاجات محتاجة كط

وفى حاجات فريدة فى نوعها

وفى حاجات يستحيل رجوعها

وفى حاجات لو حسينا بمواجيعها

تبكى عينينا من سكات

وفى حاجات زى الربيع

وفى حاجات مكناش نتخيل تضيع

وفى حاجات نشتريها بالغالى

وبرخص التراب نبيع

وفى حاجات غامضة وواضحة

وفى حاجات بعيوبها فاضحة

وفى حاجات مخدناش منها غير الفتات

وفى حاجات ملهاش ملامح

وفى حاجات زى لون العتمة بس فاتح

وفى حاجات الصدق جواها جارح

وفى حاجات بنستناها تجينا

وفى حاجات تايهة فى مراسينا

وفى حاجات زى شوارع المدينة

زحمة وقلق بس غرقانة فى سبات

وفى حاجات مش ممكن نلاقيها

وفى حاجات تايهة فى اراضيها

وفى حاجات مهما نراضيها

يفوت العمر واحنا فى البدايات

وفى حاجات زى مراحل العمر متقسمة

وفى حاجات حزينة بس متبسمة

وفى حاجات واصلة لسابع سما

وفى حاجات فوقها سبع طبقات

وفى حاجات جوانا مدفونة

وفى حاجات عاقلة بنت مجنونة

وفى حاجات فى الهم مطحونة

وفى حاجات صابرة على البلوات

وفى حاجات وحاجات وحاجات

موضوع: رد: حاجات الأحد يوليو 18, 2010 2:04 am

حلوه ياشاعر

ياتري مين بقي الشاعر

ياريت تملي البطاقه اللي فالاعلان عشان نعرفك

عدد المساهمات : 93 تاريخ التسجيل : 21/06/2010

لا بجد مش عارف اقولك ايه
الله ينور عليك والله
انت حد متمكن جدا بجد
ربنا يوفقك ومنورنا