صحح معلوماتك : 1 : إن شاء الله

السلام عليكم و رحمة الله و بركاته

كتير مننا بيكتب كلام يمكن يكون عارف معناه بس مش عارف الطريقة الصح لكتابته
يمكن تكون الأخطاء دى عادية فى لغتنا العامية أو هى مش أخطاء أصلاً
على اعتبار ان مفيش طريقة معينة للكتابة بالعامية
لكن لما الموضوع يتعلق بالكتابة فى المواضيع الإسلامية
يبقى احنا محتاجين نركز شوية و احنا بنكتب لأن الحرف الواحد ممكن يغير المعنى
إن شاء الله نبدأ موسوعة نصحح بيها معلوماتنا عن طرق كتابة بعض الكلمات أو الجمل

النهاردة هنبدأ بجملة "إن شاء الله"

الجملة دى بنستخدمها لما نكون ناوين على شىء فى المستقبل القريب أو البعيد
و إيماناً مننا بقدرة ربنا و قدره بنقول ان الشىء ده هيحصل لو شاء الله

بالتالى "إن شاء الله" تعنى "إذا أراد الله ذلك"

و بنقول كده بناءًا على أمر الله سبحانه و تعالى فى الآيه :
وَلا تَقُولَنَّ لِشَيْءٍ إِنِّي فَاعِلٌ ذَلِكَ غَداً ، إِلَّا أَنْ يَشَاءَ اللَّهُ وَاذْكُرْ رَبَّكَ إِذَا نَسِيتَ وَقُلْ عَسَى أَنْ يَهْدِيَنِ رَبِّي لِأَقْرَبَ مِنْ هَذَا رَشَداً

طب إيه الغلطة اللى بنغلطها احنا ؟
بنكتب "إنشاء" بدلاً من "إن شاء"
و دى مشكلة ؟
اه مشكلة كبيرة ،
لأننا غيرنا المعنى لمعنى لا يجوز قوله أو كتابته نهائى

كلمة إنشاء فى القرآن تعنى : الخلق أو الإيجاد من العدم
ربنا بيقول فى القرآن الكريم عن الحور العين -نساء الجنة-

{ إِنَّا أَنشَأْنَاهُنَّ إِنشَاء * فَجَعَلْنَاهُنَّ أَبْكَارًا * عُرُبًا أَتْرَابًا } الواقعة/37-35

تخيلوا بقى لو احنا كتبنا كلمة إنشاء ، اللى هى معناها الإيجاد من العدم
جنب لفظ الجلالة "الله" ، فكروا كده المعنى يبقى ايه ؟؟

يبقى من النهاردة نتعود نقولها صح و نصحح معلوماتنا
إن شاء الله تُكتب (إن شاء) الله و ليست (إنشاء) !

و الصورة دى عشان تأكد المعلومة و تساعدنا فى نشرها



و إن شاء الله نصحح معلومة تانية قريب : )

سلام عليكم